وانشگٹن : (وہب ڈیسک) امریکی صدر ڈونلڈ ٹرمپ نے بڑا اعلان کیا ہے کہ صدر نکولاس مادورو اور خاتون اوّل کی گرفتار کے بعد وینزویلا کے معاملات اب امریکا چلائے گا۔
وینزویلا میں امریکی فوج کے غیر معمولی آپریشن کے حوالے سے پریس کانفرنس میں صدر ڈونلڈ ٹرمپ نے کہا کہ میری ہدایت پر امریکی فوج نے وینزویلا کے دل کراکس میں تاریخی آپریشن کیا جس میں زمینی، فضائی اور بحری راستے استعمال کیے گئے۔
ڈونلڈ ٹرمپ نے بتایا کہ فوجی آپریشن کے دوران 45 امریکی فوجی اہلکاروں نے کراکس میں نکولاس مادورو اور ان کی اہلیہ کو باہر نکالا، امریکا نے اسی طرح کا آپریشن حال ہی میں ایران میں بھی کیا تھا، آپریشن کے دوران دارالحکومت کراکس کی بجلی بند کی گئی تھی۔
امریکی صدر نے بتایا کہ نکولاس مادورو کو ان کی اہلیہ کے ساتھ حراست میں لایا گیا اب ان کو نیویارک میں عدالت کا سامنا کرنا پڑے گا۔
انہوں نے مزید کہا کہ ایک رات میں کامیاب آپریشن پر فوج کو خراج تحسین پیش کرتا ہوں، امریکا کو آج دنیا میں عزت کی نگاہ سے دیکھا جا رہا ہے، ایسا لگتا ہے نکولاس مادورو ہماری فوج کا ہی انتظار کر رہے تھے کیونکہ ان کو معلوم ہوگیا تھا کہ امریکی بحری بیڑے قریب آگئے ہیں۔
آپریشن میں کسی امریکی فوجی یا عسکری تنصیب کا نقصان نہیں ہوا
نکولاس مادورو کی گرفتاری کے بعد کی تصویر کا حوالہ دیتے ہوئے ڈونلڈ ٹرمپ نے صحافیوں سے کہا کہ آپ نے تصویر دیکھ لی ہے کہ وینزویلا کے صدر کیسے کپڑوں میں تھے، آپریشن میں کسی امریکی فوجی یا عسکری تنصیب کا نقصان نہیں ہوا، کوئی امریکی فوجی زخمی یا مارا نہیں گیا۔
انہوں نے الزام عائد کیا کہ امریکا میں 97 فیصد منشیات سمندری راستوں کے ذریعے وینزویلا سے ہی آ رہی تھی۔
ہم اقتدار کی پُرامن منتقلی کیلیے اقدامات کریں گے
امریکی صدر کا کہنا تھا کہ وینزویلا کے معاملات اب امریکا چلائے گا ملکی انتظامات عارضی طور پر سنبھالے گا، چاہتے ہیں کہ وینزویلا میں پرامن طور پر اقتدار کی منتقلی ہو، وہاں کے بہت سے شہری امریکا میں رہتے ہیں اور واپس اپنے وطن جانا چاہتے ہیں، وہاں کی عوام پر کسی کو ظلم نہیں کرنے دیں گے، ہم اقتدار کی پرامن منتقلی کیلیے اقدامات کریں گے۔
ضرورت پڑی تو وینزویلا پر دوسرا حملہ کریں گے
ان کا کہنا تھا کہ وینزویلا پر دوسرے حملے کی ضرورت نہیں پڑے گی لیکن ہم تیار ہیں، اگر ضرورت پڑی تو دوسرا حملہ کریں گے، خطے کے استحکام کیلیے امریکا اپنا کردار ادا کرے گا۔
آپریشن کا مقصد مادورو کو انصاف کے کٹہرے میں لانا ہے
ڈونلڈ ٹرمپ نے پریس کانفرنس میں مزید کہا کہ آپریشن کا مقصد ڈکٹیٹر مادورو کو انصاف کے کٹہرے میں لانا ہے، وہ اور ان کی اہلیہ امریکی عدالت میں پیش ہوں گے، امریکا کے پاس ان کے جرائم کے شواہد موجود ہیں۔
امریکی صدر نے کہا کہ مادورو نے امریکا کے خلاف مسلسل تشدد اور دہشتگردی کی، اقتدار کی منتقلی تک وینزویلا پر امریکی کنٹرول جاری رہے گا۔
امریکی سلامتی کے خلاف اقدامات کرنے والے یہ آپریشن دیکھ لیں
انہوں نے دھمکی دی کہ جو امریکی سلامتی کے خلاف اقدامات کرتے ہیں وہ یہ آپریشن دیکھ لیں سلامتی کو کوئی خطرہ ہوا تو بھرپور کارروائی کریں گے، آپریشن کر کے وینزویلا کے عوام کو آمر سے آزادی دلا دی ہے۔
