اسلام آباد(18 دسمبر 2025): آئندہ 5 سال تک پٹرولیم ڈویلپمنٹ لیوی عوام کی جان نہیں چھوڑے گی، پاکستان نے بین الاقوامی مالیاتی فنڈ (آئی ایم ایف) کو اگلے پانچ سالوں کے لیے پیٹرولیم ڈویلپمنٹ لیوی کی وصولیوں کے تخمینے پیش کردیئے۔
ذرائع کے مطابق جمع کرائی گئی دستاویزات کے مطابق یکم جولائی 2026 سے کلائمیٹ سپورٹ لیوی میں فی لیٹر 2.5 روپے کا اضافہ بھی کیا جائے گا، ہر گزرتے سال کے ساتھ پیٹرولیم لیوی کی وصولیوں میں اضافے کا تخمینہ تیار کرلیا گیا۔
دستاویزات کے مطابق رواں مالی سال کے لیے وصولیاں 1,468 ارب روپے متوقع ہیں، جبکہ اگلے مالی سال کے لیے تخمینہ 1,638 ارب روپے ہے، مالی سال 2027-28 کے لیے 1,787 ارب روپے، 2028-29 کے لیے 1,989 ارب روپے اور 2029-30 کے لیے 2,212 ارب روپے کا ہدف رکھا گیا ہے۔
رپورٹ میں شامل تاریخی اعداد و شمار کے مطابق گزشتہ مالی سال میں پیٹرولیم لیوی کی وصولیاں 1,220 ارب روپے تھیں، 2023-24 میں 1,019 ارب روپے اور 2022-23 میں 580 ارب روپے تھیں۔
دستاویزات میں مزید بتایا گیا کہ فی الحال پیٹرول پر لیوی 79.62 روپے فی لیٹر ہے، جبکہ ہائی سپیڈ ڈیزل پر 75.41 روپے فی لیٹر لیوی عائد ہے۔ کلائمیٹ سپورٹ لیوی 2.5 روپے فی لیٹر الگ سے پیٹرول اور ڈیزل دونوں پر عائد ہے۔
یہ تخمینے حکومت کے پیٹرولیم سے مالی محصولات کو برقرار رکھنے اور کلائمیٹ سے متعلق اقدامات کے لیے اضافی لیوی کے ذریعے وسائل جمع کرنے کے منصوبوں کی عکاسی کرتے ہیں۔
گذشتہ پندرہ روزہ جائزے میں حکومت پاکستان نے پیٹرول کی قیمتوں اور دیگر پیٹرولیم مصنوعات میں تبدیلیوں کا نوٹیفکیشن جاری کیا تھا۔
نوٹیفکیشن کے مطابق حکومت نے نئی پیٹرولیم قیمتیں جاری کیں، پیٹرول کی قیمت کو 263.45 روپے فی لیٹر پر برقرار رکھا گیا جبکہ ہائی سپیڈ ڈیزل کی قیمت میں 14 روپے کی کمی کرکے 265.65 روپے فی لیٹر کر دی گئی۔
